រដ្ឋាភិបាល​វ៉ាស៊ីនតោន បន្ធូរបន្ថយ​ទណ្ឌកម្ម​សេដ្ឋ​កិច្ច​អ៊ីរ៉ង់

វ៉ាស៊ីនតោន​៖ កាលពី​ថ្ងៃ​ចន្ទ ម្សិលមិញ​នេះ សហរដ្ឋអាមេរិក បានចាប់ផ្តើម​កាត់បន្ថយ​ទណ្ឌកម្ម​សេដ្ឋកិច្ច សម្រាប់​ប្រទេស​អ៊ីរ៉ង់ បន្ទាប់​ពី​សាធារណរដ្ឋ​ឥស្លាម​មួយ​នេះ បាន​ចាត់វិធានការ​រឹងមាំ ក្នុង​ការទប់ស្កាត់ កម្មវិធី​នុយក្លេអ៊ែរ​ខ្លួន​។​
​យោងតាម​ទីភ្នាក់ងារ​ព័ត៌មាន​ចិន ស៊ិនហួ បានឲ្យ​ដឹង​ដោយ​ដកស្រង់​សំដី​រប​ស់ ក្រសួងការបរទេស អាមេរិក​ថា រដ្ឋមន្ត្រីការបរទេស​អាមេរិក លោក ច​ន ឃឺ​រី បាន​យល់ព្រម​បន្ធូរបន្ថយ ទណ្ឌកម្ម​សេដ្ឋកិច្ច មួយចំនួន​ចំពោះ​ប្រទេស​អ៊ីរ៉ង់ ក្នុងនោះ​មាន​ក្រុមហ៊ុននាំចេញ​ប្រេង កិច្ចការ​ជំនួញ​អន្តរការណ៍​ហិរញ្ញវត្ថុ និង​ការ ធ្វើ​ជំនួញ​មាស និង​លោហធាតុ​មានតម្លៃ​។​
​ក្រសួងការបរទេស​អា​មេរិក បានចេញ​សេចក្តីថ្លែងការណ៍​ថា ខ្លួន​បាន​បោះជំហាន​ចាំបាច់ សម្រាប់​កិច្ច​ខិតខំ ប្រឹងប្រែង នៃ​ការបង្អាក់​ជា​បណ្តោះអាសន្ន ដើម្បី​កាត់បន្ថយ​ការ នាំចេញ​ប្រេង​ឆៅ​របស់​អ៊ីរ៉ង់ ដោយ​អនុញ្ញាត​ឲ្យ អតិថិជន​ចំនួន ៦​នៃ​វិស័យ​ប្រេង​អ៊ីរ៉ង់ អាច​រក្សា​នូវ​ការទិញ របស់​ពួកគេ នៅ​កម្រិត​កាត់បន្ថយ​ថ្មីៗ រយៈពេល ៦​ខែ​នៃ​កិច្ចចរចា​បណ្តោះអាសន្ន លើ​កម្មវិធី​នុយក្លេអ៊ែរ​៕​